Novas

Novas e actualidade do Grupo Cuevas

Archivos

GRUPO CUEVAS NO FORO ENRIQUE PEINADOR SOBRE EMPRESAS CON IDENTIDADE GALEGA

25 Xuño, 2012

O luns 25 celebrouse no salón de actos do Centro Cultural "Marcos Valcárcel" da Deputación de Ourense o Foro Enrique Peinador sobre empresas con identidade galega. Grupo Cuevas estivo presente como exemplo de empresa polo uso deste idioma. María Castro e Antonio Suárez explicaron como as vontades e as conviccións marcan de xeito claro os comportamentos colectivos. No Grupo Cuevas non se considerou nunca o uso do galego como unha obrigatoriedade nin unha conveniencia temporal; nin se valorou nunca como un plus de negocio. Protexeuse, iso si, a expresión libre que foi collendo forma constantemente. Así é como o hábito do galego acabou callando como consecuencia do exercicio sistemático dunha conciencia: a de ser galegos.
Ver programa

Prensa

Ver vídeo

AS MAÑÁS DE CATRO FALA DA CASTAÑA NA ALTA COCIÑA

22 Xuño, 2012

O magazine Las Mañanas de Cuatro recolle a conferencia de Pepe Rodríguez Rey dentro do Foro da castaña organizado por Grupo Cuevas. As castañas pasaron de ser produtos humilde a estar na maior parte dos restaurantes que teñen unha estrela Michelín. Un produto cun baixo contido calorífico, rica en fibras e vitaminas. Todo un mundo de posibilidades.

PEPE RODRIGUEZ REI, PREMIO NACIONA DE GASTRONOMÍA, NO FORO DA CASTAÑA

18 Xuño, 2012

O luns 18 de xuño, de 19:00 h a 20:00, no centro cultural da Deputación, Pepe Rodríguez, premio nacional de Gastronomía ao mellor cociñeiro español, falaranos sobre "Por que os produtos humildes conquistan a alta cociña. A cociña pobre é agora gastronomía exquisita".
Pepe Rodríguez Rey é o mellor exemplo de como a cociña con produtos humildes, que en tempos eran o único recurso para saciar a fame, entrou nos pratos dos grandes xefes de cociña. Premio nacional de Gastronomía en 2011, como mellor xefe de cociña español e Premio Xefe de cociña Millesimé. Distínguese por ser un xefe de cociña elegante e harmónico. O seu restaurante El Bohío, en Toledo, captou o interese dos prestixiosos críticos gastronómicos do mundo pola súa fusión entre a cociña creativa e a cociña tradicional. Posúe unha estrela Michelín dende 1999. Curtido cos grandes da cociña como Berasategui, Jean Luc Figueras ou Ferrán Adriá, El Bohío é hoxe un centro de aprendizaxe obrigatoria para as novas xeracións de cociñeiros.
Pepe Rodríguez Rey elaborará en directo os seus pratos con castaña.
Ver imagen

Dossier de prensa

APRENDER A COCIÑAR NO PROPIO SÚPER

12 Xuño, 2012

Unha iniciativa do IES Vilamarín e o Grupo Covas ensina a elixir produtos e preparar novos pratos mentres se fai a compra no supermercado.
Elixir o corte de carne máis axeitado para un estufado, como combinar ingredientes para obter sabores novos, ou coñecer os mellores sistemas de conservación para os distintos alimentos, serán algunhas das moitas técnicas que se poderán aprender ao mesmo tempo que se fai a compra diaria ou mentres se garda quenda na cola do peixe. Propiciar novos menús cos produtos de sempre con algunha innovación engadida, e aprender a distinguir a madureza conveniente dunha froita, ou a preparación dun peixe segundo para que sexa estarán ao alcance dos que queiran cambiar a súa rutina na alimentación diaria.
Alumnos avanzados de cociña darán as explicacións e ofrecerán os consellos sobre todas as dúbidas que se lle poidan formular aos que teñan interese en explorar novas posibilidades culinarias, ou mellorar os seus coñecementos á hora de elixir, aproveitar e combinar os produtos da súa alimentación diaria.
A iniciativa, auspiciada pola Escola de Hostalaría de Vilamarín e o Grupo Cuevas, desenvolverase experimentalmente durante os martes e venres do mes de xuño en horario de 10:30 a 13:00 no supermercado Aquie da rúa Doutor Fleming (Ourense). Os clientes ademais poderán participar no sorteo diario dun menú para dúas persoas no restaurante do IES Vilamarín.
O proxecto inicia un plan de colaboración entre o IES Vilamarin, que cumpriu en 2012 vinte e cinco anos cunha matrícula próxima aos 300 alumnos, e o Grupo Cuevas, creador da marca Aquíé, un novo concepto de supermercado que foi seleccionado en 2009 como unha das seis propostas máis innovadoras do mundo. A aproximación práctica do ámbito formativo e o mundo empresarial, e a proxección da marca Ourense asociada á alimentación de calidade e a boa mesa son os principais obxectivos cos que xorde esta alianza, que terá continuidade en futuras iniciativas.
Bases concurso

GRUPO CUEVAS IMPULSA A PASTA CON FARIÑA DE CASTAÑA CON ANDREA TUMBARELLO

11 Xuño, 2012

Nestes últimos días Grupo Cuevas mantivo encontros e reunións co prestixioso xefe de cociña Andrea Tumbarello para testar varios produtos nos que se traballa dende hai meses. Unha das claves dos estudos pasa por elaborar unha fariña de castaña que ao mesturala coa de trigo dá lugar a un produto de alta calidade. A iniciativa pretende potenciar o aproveitamento da castaña, tanto dende o punto de vista gastronómico como turístico. Para iso puxéronse en marcha varias frontes de traballo. Grupo Cuevas contactou cos xefes de cociña dos restaurantes máis prestixiosos do país tanto para que acudan á cidade de As Burgas a realizar demostracións dos pratos que xa elaboran con castaña, como para descubrir o potencial do froito que aínda non foi explotado.
Noticias en prensa